🚨 Qozog‘istonga aloqador bo‘lishi taxmin qilinayotgan xakerlar O‘zbekiston davlat tizimlariga hujum qilgan 💻
Kiberxavfsizlik sohasidagi dunyoning yetakchi tadqiqot markazlaridan biri — VMRay portali mutaxassislari Markaziy Osiyo mintaqasi uchun jiddiy xavotir uyg‘otuvchi hisobotni e’lon qildi.
Unga ko‘ra, kelib chiqishi Qozog‘iston bilan bog‘liq bo‘lishi mumkin deb taxmin qilinayotgan Hydra Saiga (shuningdek YoroTrooper, ShadowSilk va Silent Lynx nomlari bilan ham tanilgan) xakerlar guruhi mintaqadagi strategik obyektlarga tizimli kiberhujumlar uyushtirgan.
Tadqiqotchilarning ta’kidlashicha, ushbu guruh:
• hukumat idoralari
• energetika sektori
• muhim infratuzilma obyektlari
ga qaratilgan keng ko‘lamli kiberjosuslik faoliyati bilan shug‘ullanib kelgan.
Xususan, hujumlar quyidagi tashkilotlarga qaratilgani qayd etilgan:
• O‘zbekiston Suv xo‘jaligi vazirligi
• viloyat hokimliklari
• ilmiy-tadqiqot institutlari
Ma’lumotlarga ko‘ra, faol kiberhujumlar bosqichi 2024-yil sentyabridan 2025-yil martigacha davom etgan.
Mutaxassislar e’tiborini tortgan jihatlardan biri — xakerlarning asosiy qiziqishi suv resurslarini boshqarish tizimlariga qaratilganidir. Bu esa nafaqat ma’lumotlarni o‘g‘irlash, balki strategik ahamiyatga ega bo‘lgan suv va energetika tizimlari ustidan yashirin nazorat o‘rnatishga urinish bo‘lishi mumkin.
Tadqiqotchilar xulosasiga ko‘ra, Hydra Saiga guruhi faoliyati moliyaviy manfaatlarni ko‘zlamaydi. Aksincha, uning harakatlari geosiyosiy va strategik xarakterga ega.
Bunday “state-sponsored” (davlat homiyligidagi) xakerlik guruhlari odatda:
• moliyaviy foyda olishni emas
• strategik ma’lumotlarni yig‘ishni
• muhim infratuzilma ustidan axborot ustunligini qo‘lga kiritishni
maqsad qiladi.
Garchi bu borada rasmiy ayblovlar mavjud bo‘lmasa-da, hujumlarning aynan Markaziy Osiyodagi suv taqsimoti bilan bog‘liq tashkilotlarga qaratilgani ushbu kiberjosuslik ortida yuqori darajadagi siyosiy va strategik manfaatlar bo‘lishi mumkinligini ko‘rsatmoqda.